Vekaansie an zee    

Ik waandeln laanks de zee geboogn
gung al zuukend oavert zilte straand
Doar zag ik veur mien speurders oogn
De schelpen liggend in het rulle zaand.

Het straand bezeaid met mooie schelpen
met glazen kwallen laanks de vloed
Woar eb en vloed de zee dut stelpen
Doar oonder an zien duunenvoet.

De golven spuuln umme mien veute
Het witte schoem wein op de weend
Ik spröng oaver geuln het leekn sleute
Ik veuln miej weer det kleane keend.

As keend gung ik ok laanks het water
Gung koelen graam in het lösse zaand
Ik heurn de meeuwen heur geschater
Scheernd leage doar oaver’t straand

De weend diej spöln met mien heuren
Deur de zachte bries diej kwam van zee
Ik reuk van uut de zee de zilte geuren
Het maakn miej hongerig en wee.

Zo’n dag an zee met hoge golven
Woar witte wolkn leage rollend goan
Woar vloed het straand mar blif bedolven
Det blif nog aaltied op mien netvlies stoan.

Fenny Martens Berends